Nemendur í Hagaskóla efndu til söfnunar til líknarmála 7. mars sl. og er það í þriðja sinn. Þetta var markaðs- og skemmtunardagur og kom fjölmenni til unglinganna.

Þeir höfðu ákveðið að skipta söfnuninni að þessu sinni jafnt á milli Styrktarfélags krabbameinssjúkra barna og SPES barnahjálpar. Í hlut hvors komu kr. 909.000 - hvorki meira né minna! Þetta er stórkostlegur árangur og sýnir mikinn samhug og samkennd unglinganna í Vesturbænum. Þeir lögðu hart að sér, unnu kappsamlega og mega vera stoltir af ótrúlegum árangri. Páll Óskar mætti og tók lagið og minnti á það hvað það er mikilvægt að vera góð við hvert annað.

SPES barnahjálp þakkar einstaklega höfðinglegt framlag.

Það er fallegt hjá þeim að hugsa þannig til vegalausra barna í Tógó.

Tilgangur Spes er að byggja og reka þorp fyrir foreldralaus börn. Tvö Spes-þorp eru í Afríkuríkinu Tógó, hið fyrra í höfuðborginni Lóme, en hið síðara í bænum Kpalimé. Þar eru nú 137 börn sem hafa komið til okkar á aldrinum 1-4 ára. Fyrra barnaþorpið er tilbúið og 86 börn eiga þar heimili í dag. Nýtt þorp er í uppbyggingu í Kpalime og þar býr nú 51 barn.

Húsin í barnaþorpunum okkar eru fallega hönnuð og litrík. Þau eru úr steinsteypu og stórum múrsteinum sem gerðir eru á staðnum. Henry Apeti, arkitektinn okkar, byggir þau á húsahefð frá Norður-Tógó.