Í haust gátum við fagnað tveimur stórum áföngum á Barnaheimilum SPES í Tógó.

Um miðjan september fluttu 12 fyrstu unglingsdrengirnir af heimili SPES  í Lomé yfir í nýbyggt unglingaheimili þar skammt frá. Þetta nýja heimili verður rekið sem sérdeild frá barnaheimili SPES á sama hátt og gert er í Kpalimé. Heimilið er byggt fyrir framtíðina og þarna er nú þegar pláss fyrir 20 unglinga. Áform eru um að byggja síðar annað hús á lóðinni fyrir 20 stúlkur.

Þegar skólastarf hófst í Tógó í byrjun október hófu tveir drengir frá heimili SPES í Kpalimé háskólanám í Lomé.  Komlavi Nana byrjaði að læra byggingaverkfræði og Richard Mensah fór í lögfræði. Þeir eru 19 og 20 ára og voru meðal fyrstu barnanna sem komu til SPES. Vinir SPES eru ákaflega stoltir af þessum fyrstu háskólanemum sínum.

Í Lomé  verður nú rýmra um börnin á barnaheimilinu og einnig losna pláss fyrir ný börn. Það er því mjög mikilvægt að við finnum fleiri sem vilja gerast styrktarforeldrar eða leggja SPES til reglulega styrki svo hægt sé að taka á móti fleiri börnum.

  

Á aðalfundi Íslandsdeildar SPES var kosin ný stjórn til þriggja ára.

Formaður var kosinn Örn Sævar Ingibergsson.

Aðrir í stjórn eru:

Eva María Gunnarsdóttir, varaformaður.

Elisabet Sigurðardóttir, ritari

Bera Þórisdóttir,  gjaldkeri

Hrefna Hallgrímsdóttir,  meðstjórnandi

Aðalfundur Íslandsdeildar SPES

verður haldinn laugardaginn 29. apríl kl. 10:30 í Félagsheimili Neskirkju

DAGSKRÁ

1. Skýrsla stjórnar fyrir árið 2016

2. Reikningar 2016 kynntir og bornir undir atkvæði

3. Stjórnarkjör

4. Fréttir frá Tógó

5. Önnur mál

Það var líf og fjör á heimilum SPES í Tógo þegar við, Njörður og Bera, ásamt styrktarforeldrunum Unni Jónsdóttur og Vésteini Ólasyni heimsóttum þau í september. Skólabyrjun hafði verið frestað til 17. október af óskýrðum ástæðum. Fáein börn höfðu því fengið að dvelja lengur í heimsókn til ættingja eða vina. Stálpuð börn höfðu að vanda farið til 2-3 vikna dvalar hjá vinveittri fjöldkyldu svo þau fengju tækifæri til að kynnast daglegu lífi hjá venjulegu fólki en fjölskyldan á heimilum SPES er afar stór, 102 börn í Lomé og 76 börn í Kpalimé

Í fríum skipuleggur starfsfólkið á heimilunum ýmiss konar viðburði til fróðleiks og afþreyingar og einnig námskeið til undirbúnings fyrir nýtt skólaár. Aðallega námskeið í frönsku, lestri og öðrum undirstöðugreinum og svo handverksnámskeið t.d. saumanámskeið, batiknámskeið og fleira. Hvert tækifæri er líka gripið til að dansa og syngja.

togo2016   IMGP1490

Almennt gekk börnunum heldur betur í skólanum á síðasta ári en nokkuð misjafnt eftir aldurshópum. Starfsfólkið endurskipulagði heimanámið með börnunum og tók þátt í sérstöku átaki til að bæta árangur. Aðalvandamálið er að bekkir eru oft mjög stórir, hörgull á kennurum og svo er tungumálavandi sem skólinn tekur ekki mikið tillit til. Börnin verða að vera tvítyngd , öll kennsla fer fram á frönsku meðan yngri börn tala helst Ewe eða Mina sín í milli.