Spes-tilgangurTilgangur Spes er að byggja og reka þorp fyrir foreldralaus börn. Tvö Spes-þorp eru í Afríkuríkinu Tógó, hið fyrra í höfuðborginni Lóme, en hið síðara í bænum Kpalimé. Þar eru nú 176 börn sem hafa komið til okkar á aldrinum 1-4 ára. Fyrra barnaþorpið er tilbúið og 102 börn eiga þar heimili í dag.

Nýtt þorp er í uppbyggingu í Kpalime og þar búa nú 74 börn.

Húsin í barnaþorpunum okkar eru fallega hönnuð og litrík. Þau eru úr steinsteypu og stórum múrsteinum sem gerðir eru á staðnum. Henry Apeti, arkitektinn okkar, byggir þau á húsahefð frá Norður-Tógó. 

Tógó er sárafátækt land. Þriðjungur íbúa er undir fátæktarmörkum. Fátækt og eyðni leiða til þess að fjölmörg börn fara foreldralaus á vergang án vonar um framtíð. Spes gefur þeim von. Þú getur hjálpað. Þú getur hjálpað okkur að gefa fleiri börnum von um framtíð. Allt sem þú gefur rennur beint til umönnunar foreldralausra barna. Ekkert fer í yfirbyggingu, ferðalög eða umsýslukostnað. Allt starf Spes er án endurgjalds. Öll vinna félaganna er sjálfboðastarf. Okkur vantar framlög, styrktarforeldra og nýja félaga.

Vannærð og veikburða

Öll börnin sem til okkar koma eru mjög illa á sig komin þegar við tökum við þeim. Þau eru vannærð og full af sníkjudýrum í innyflum. Tógóskur barnalæknir kemur á hverjum laugardegi og fylgist með þeim. 
Það er gleðiefni hvað þau hafa tekið vel við sér. Sérstaklega er ánægjulegt að sjá framfarir þeirra, og hversu þau geisla af heilbrigði og vellíðan. Þetta er áberandi á myndunum af börnunum sem er að finna annars staðar á síðunni. Flestum börnunum okkar gengur vel í skólanum. Sum eru í fremstu röð jafnaldra sinna.
Börnin koma til Spes fyrir tilstuðlan félagsmálayfirvalda. Við óskum einungis eftir því að þau séu undir 5 ára aldri. Þá er auðveldara að samlaga þau hópnum sem fyrir er. Einnig stefnum við að því að drengir og telpur séu ámóta mörg.

Íslenska frumkvæðið

Frumkvæðið að stofnun samtakanna er íslenskt. Njörður P. Njarðvík, sem nú er prófessor emeritus í íslenskum bókmenntum við Háskóla Íslands, var ásamt vinum sínum Tógóanum Victor de Medeiros og Frakkanum Claude Voileau frumkvöðull að stofnun samtakanna.
Vinir þeirra frá Tógó vöktu máls á því hversu ótrúlega mörg börn í þróunarlöndunum byggju við hörmulegar aðstæður. Stríð, náttúruhamfarir, mikil fátækt, malaría og eyðnifaraldurinn hefur leitt til þess að fjölmörg börn verða foreldralaus og lenda á vergangi.
Þessi vinahópur, sem teygði sig um mörg lönd, varð sammála um að láta ekki sitja við orðin tóm. Hann afréð að stofna samtök sem hefðu að markmiði að hjálpa foreldralausum börnum. 
Samtökin Spes International voru í kjölfarið stofnuð í febrúar 2000. Þau hafa aðsetur í París í Frakklandi. Spes er skammstöfun fyrir heiti samtakanna á frönsku, Soutien Pour l´Enfance en Souffrance. Styrktarforeldrar SPES eru nú í 10 löndum.

Hversvegna Tógó?

Sterk tengsl frumkvöðlanna við Tógó og brýn þörf fyrir hjálp handa nauðstöddum börnum leiddu til þess að fyrsta barnaþorpinu var valinn staður í Tógó. Fátækt er þar landlæg og þriðjungur íbúanna býr undir fátæktarmörkum.
Frumkvöðlarnir vissu líka að þar voru sterkir einstaklingar reiðubúnir til að vera bakhjarlar á staðnum. Sérstök Tógódeild var stofnuð á vegum Spes. Í henni eru reyndir og vandaðir einstaklingar með mikla reynslu, m.a. af heilbrigðismálum og viðskiptum. Þeir eru bakhjarlar barnaþorpanna í Lóme og Kpalimé og fylgjast náið með rekstri þeirra.

Pin It